Ensk.is með rúmlega 38 þúsund færslur

Það er gaman frá því að segja að vinna við ensk.is orðabókina hefur gengið vel síðastliðið hálft ár. Færslurnar eru orðnar að verða 38 þúsund, þar af rúmlega 8 þúsund handsmíðaðar viðbætur og endalaust margar umbætur á upprunalegu skilgreiningum Zoega. Vefurinn hefur m.a. verið sérlega endurbættur fyrir tæki á borð við snjallsíma. Nú geyma síður fyrir stakar færslur auk þess samheiti yfir viðkomandi enskt orð, eins og sjá má á myndinni. Heimsóknum á vefinn fjölgar jafnt og þétt, sirka 400 stakir alvöru gestir á dag að öllu jöfnu, en yfirgnæfandi meirihlutinn af traffikinni kemur reyndar frá skröpurum stóru tæknirisanna, þ.m.t. þeirra kínversku, sem skófla þessu væntanlega inn í þjálfunargögn fyrir stóru mállíkön sín. Það hlýtur að skila sér á einn eða annan hátt í betri íslenskuskilningi gervigreindarinnar þegar fram líða stundir. Í millitíðinni hjálpar þetta vonandi öllum Íslendingum sem þurfa að eiga við enska tungu.