Hoppandi ruglað að hækka eftirlaunaaldur

<nöldur>

Það er nú meira helvítis illska og níðingsskapur að ætla að hækka eftirlaunaaldurinn á Íslandi í 70 ár. Eiginlega bara viðbjóðslegt svindl og mannvonska, ef áformin eru ekki afsprengi tærrar heimsku og fáfræði.

Íslendingar vinna nú þegar mjög langa vinnuviku, yfir mjög langa starfsævi, miðað við nágrannaþjóðir. Atvinnuþátttaka hér á landi, um 80%, er með því allra hæsta sem þekkist í ríkum löndum. Sögulega hefur verið afskaplega lítið atvinnuleysi á Íslandi frá stríðsárunum.

Þá eru Íslendingar enn ung þjóð, miðgildisaldur er 36 ára, og okkur heldur áfram að fjölga þökk sé innflytjendum þótt að fæðingartíðni heimamanna hafi færst rétt niður fyrir "replacement rate" á seinni árum. Aldursdreifing er á mjög góðum stað miðað við flestar ríkar (og fátækar) Evrópuþjóðir (sjá mynd). Við erum meiriháttar matvælaframleiðandi: Veiðar á Íslandsmiðum eru um 1,5% af fiskveiðum heims, og vafalust stærra hlutfall af markaðsvirði þótt mér hafi ekki tekist að finna þær tölur. Hér er líka svo gott sem óendanleg endurnýjanleg orka m.t.t. mannsfjölda. Við erum á mjög góðum stað, mun betri stað en flestöll ríki heims, og stöndum svo sannarlega ekki frammi fyrir neinni kerfislægri lýðfræðikrísu.

Af hverju vilja menn þá hækka eftirlaunaaldurinn? Er pælingin sú að bregðast snemma við lýðfræðilegri þróun hvers afleiðingar verða ekki ljósar fyrr en 2060-2070? Það er ótrúlega skammsýnt og bjánalegt. Heimurinn verður allt öðruvísi eftir fimmtíu ár, og með sjálfvirkni- og tæknivæðingu mun vinnumarkaðurinn líta allt öðruvísi út.

Nú um árið var menntaskólinn styttur til þess að koma ungu fólki fyrr út á vinnumarkaðinn [!] (e.t.v. í öll þessi sexí, vel launuðu túristadjobb?). Nú stendur til að lengja starfsævina. Hvaða rugl er þetta eiginlega? Við ættum að gera hið gagnstæða: lengja námstíma til að búa okkur undir hátæknihagkerfið sem koma skal, og stytta starfsævi og vinnutíma í takt við aukna sjálvirknivæðingu.

Maður getur ekki annað en dæst yfir bjánunum sem fara með völdin í þessu landi. Virðast ekkert vita um umheiminn, og hugsa í mesta lagi eitt skref fram í tímann, ef þeir eru þá yfirhöfuð færir um að hugsa um annað en rassgatið á sjálfum sér.

</nöldur>