Ég datt fram fyrir mig á hjólinu í gær og lenti á andlitinu á malbikið. Önnur framtönnin mín fór beint í gegnum neðri vörina á mér og mölbrotnaði á malbikinu, skiljandi eftir fjölmörg tannbrot inni í varaholdinu. Blóð spýttist út um allt. Ég dílaði mjög karlmannlega við þetta -- stóð á fætur, hrækti út úr mér tannbrotum og slímkekkjuðu blóði, hringdi í leigubíl til þess að taka mig á slysó og kveikti mér síðan í sígarettu.
Ég lít núna út eins og ég búi í Glasgow en ekki Edinborg.
Hins vegar hefur þessi annars leiðinlega upplifun leyft mér að kynnast náið breska heilbrigðiskerfinu -- og ég er mjög ánægður með það. Vissulega var einhver bið á bráðamóttökunni, en ég fékk mjög fína læknisaðstoð: brotin voru tínd úr holdinu, vörin á mér var saumuð saman og mér var afhent helling af pensillíni. Á leiðinni út stoppaði ég í afgreiðslunni til þess að borga, en þá starði móttökudaman á mig hissa og benti mér á að öll læknisþjónustan væri ókeypis. Eitthvað mættu þeir læra af þessu heima á Íslandi.
Ég fór síðan til tannlæknis í dag, og lét skella í mig nýrri framtönn, ofan á litla tannstubbinn sem eftir sat. Þetta tók um eina og hálfa klukkustund, og kostaði mig 11 þúsund krónur. Það er minna heldur en ég borga fyrir að fara í skoðun heima.
Bretarnir búa við góða læknisaðstoð. Ég veit ekki hvað þeir eru alltaf að væla.
(Halldór Eldjárn)
Add Comment |
RSS Feed
Shit, gott að það er sæmilega í lagi með þig allavega.
Annars hefðirðu auðvitað átt að taka Shane McGowan á þetta og sleppa tannsa. Las reyndar einhversstaðar að hann hafi farið og fengið nýtt sett á sínum tíma en brotið stærstan hluta af því innan viku þegar hann datt í einhverju ölæði. What a man.
0
▽
hax