Hef ekki skrifað neitt í svolítinn tíma, þar sem ég hef ekki haft aðgang að netinu. Ég er kominn til Edinborgar. Án málalenginga, þá er þessi borg hin argasta snilld -- virkilega falleg og hlýleg, og gott að vera hér. Vatnið úr krananum er býsna gott, loftið ferskt og kalt.
Húsnæðið sem ég deili með Grétari Amazeen er ótrúlega fínt -- 75 fermetrar, jarðhæð í raðhúsi, um 25 mínútur frá Edinborgarháskóla. Eina sem vantar er internettenging, en við ætlum að redda því með því að fá okkur monster tengingu sem allra fyrst.
Við erum þrír í prógramminu sem ég er í. Kennararnir okkar eru fjórir. Það eru semsagt fleiri kennarar í prógramminu heldur en nemendur, sem er auðvitað frábært. Samnemendur mínir eru tveir Ameríkanar sem virðast fínir. Kennslan fer fram í gegnum interactive tutorial sessions, og efnið sem ég er að fást við er mjög spennandi. Var í morgun að ræða um stjórnspeki Hobbes og Lockes. Kennararnir eru flestir frá Englandi, en ekki skoskir, sem er e.t.v. ágætt, þar sem það er alveg djöfullega erfitt að skilja hvað Skotarnir eru að segja.
Í heildina séð leggst þetta allt mjög vel í mig -- Edinborg á eftir að reynast mér betur heldur en Lundúnir. Skrifa meira þegar okkur tekst að redda internettengingu...
(Arnaldur)
Add Comment |
RSS Feed
0
▽
Þetta húsnæði verður ekki lengur ótrúlega fínt eftir að ég kem.