Sveinbjorn Thordarson

Jón Sigurðsson, PhD

Jón Sigurðsson, núverandi iðnaðar- og viðskiptaráðherra, þykir líklegur til þess að taka við formennsku Framsóknarbatterísins. Á vefsíðu iðnaðarráðuneytisins er birt ferilskrá Jóns. Þar stendur að hann hafi eftirfarandi menntun:

• Fjármagnsmarkaðir (2000 Endurmenntun Háskóla Íslands, Reykjavík)
• MBA í rekstrarhagfræði (1993 National University, San Diego, Kal. Bandar.)
• PhD, MA í menntunarfræði (1990, 1988 CPU - fjarnámsstofnun, Kal. Bandar.)
• BA í sagnfræði og ísl. fræðum (1969 Háskóli Íslands, Reykjavík)

Nokkuð impónerandi ferilskrá, ekki satt? Það eitt að maðurinn hafi BA gráðu gerir hann sennilega að menntaðasta manni Framsóknarflokksins, sem er þó eitthvað. En hann hefur ekki numið þar staðar, heldur er hann bæði með MA gráðu og doktorspróf í *menntunarfræðum*, og trompar það með glæsilegri Master of Business Administration gráðu -- greinilega mikill fræðimaður og spekingur hér á ferð.

Ég ákvað að athuga málin aðeins nánar, og byrjaði á því að kíkja á skólann sem maðurinn hefur MBA gráðu sína frá: National University, San Diego. Vefsíða skólans kynnir hann undir þeim formerkjum að hann bjóði:

"Accredited online college degrees for adults in continuing education."

Gott og vel, Jón hefur náð sér í "online" MBA gráðu frá einhverjum obskúrum bandarískum háskóla. Síða skólans gefur til kynna að þetta sé allavega sæmilega "kosher" -- þótt það veki auðvitað ýmsar spurningar að nöfn starfsmanna og fræðimanna við skólann er hvergi getið.

Hin glæsilega menntastofnun,
California Pacific University

En hvað með MA og doktorsgráður Jóns? Þær eru frá einhverjum skóla sem heitir CPU. Hvers konar skóli er þetta? Smá rannsókn á netinu færði mér heimasíðu California Pacific University. Af myndinni til hliðar að dæma þá er hér afskaplega merk menntastofnun á ferðinni. Það fyrsta sem greip athygli mína er það að skólinn virðist hýstur í 200 fermetra húsi á jarðhæð. Það, og hlekkurinn "Beware of Fraud" til vinstri. Á síðunni sem hlekkurinn vísar á stendur eftirfarandi:

"Unfortunately the Internet can shelter many fraudulent enterprises that attempt to use the good names of fine universities. Therefore, naturally there are imposters [sic] out there pretending to be California Pacific University, so don't be fooled!

One thing is for sure, you certainly can not earn an MBA from California Pacific University in 72 hours."

Vá! Það er aldeilis hughreystandi að vita að það tekur ekki bara 72 tíma að fá MBA gráðu þarna. Hversu langan tíma ætli það taki? Viku? Tvær? Hvað ætli hann Jón hafi þurft að hafa fyrir doktorsgráðunni sinni fínu?

Enn merkilegri þótti mér textinn sem birtist þegar ég smellti á "Method of Instruction":

"Students are supplied with course Study Guides, especially written by the California Pacific faculty, to accompany textbooks by recognized authorities in their fields. Each course is divided into the appropriate number of lessons to properly teach the course. These lessons bring the instructor to the student wherever the student may be. They speak to the student in the same way that an instructor would if the instructor were with the student in person. Students take their open book examinations in the privacy of their own homes or offices. Only one final proctored examination is required prior to graduation."

Jahá, það er greinilegt að þarna eru fyrsta flokks gráður í boði -- bara alveg eins og alvöru háskóli. Nema það kostar bara hundrað dollara á mánuði per námskeið (ódýrt og gott!) -- og þeir bjóða upp á katalóg með mismunandi gráðum. Ekki amarlegt að geta rúllað gegnum verðlistann og valið sér það sem manni langar í -- hér er hinn frjálsi markaður svo sannarlega að verki. Engin bjúrókrasía að mergsjúga fjárhaginn, eins og í skólum á borð við, tjah, Harvard og Stanford. Þarna er greinilega skilvirkni í gangi. Svo segja þeir allavega:

"California Pacific University's quality programs will save students up to $16,000.00 in tuition fees alone. The reason for CPU s lower tuition is a tight control on costs, lack of educational bureaucracy, no tenured faculty, no excess administrators."

Já, hann Jón er svo sannarlega hámenntaður doktor -- Ætli hann hafi ekki sent tjekkann í pósti og fengið skírteinið til baka með DHL? Ég veit ekki af hverju ég er að fara að eyða rándýrum árum í LSE þegar ég get klifið til metorða sem rektorinn á Bifröst og síðar iðnaðar- og viðskiptaráðherra, með svona fína mail-order gráðu frá California Pacific University.

Merkilega nokk, þá fékk ég í hendurnar hlébarða, ófullmótaðann, og ætla að athuga þetta merka kattadýr nánar.

Varúð! Önnur nördafærsla.

Einhverjum lesendum mínum er það vafalaust kunnugt að ég hef gegnum tíðina verið afskaplega gefinn fyrir að spila tölvuleikinn StarCraft. StarCraft er að mínu mati lang besti "Real-Time Strategy" tölvuleikur sem gerður gerður hefur verið -- stór hluti af menntaskóla hjá mér fór í að spila hann á netinu.

Í Kóreu er StarCraft orðinn eins konar költ -- það liggur við að þetta sé þjóðaríþróttin. Þar er árlega haldið heimsmeistaramót í StarCraft. Ég rakst fyrir slysni á replays af úrlsitaleikjum í heimsmeistaramótinu 2005 á netinu ásamt honum Dolla. Við fylgdumst agndofa með þessum leikjum -- þessir gaurar sem þarna eru að spila eru svo astrónómískt færir að mig hryllir við tilhugsunina um þann tíma sem þeir hafa þurft að leggja í þetta. Allir sem nokkru sinni hafa spilað StarCraft í multi-player ættu að kíkja á þetta.

Replays of Korean StarCraft Tournament Finals 2005

Þetta eru .rep skjöl, og til þess að skoða þau þarf að hafa StarCraft inni á tölvunni hjá sér.

Varúð! Nördafærsla.

Ómögulegt að greina milli Terminal glugga

Eitt af því sem hefur angrað mig hvað mest við Mac OS X undanfarin ár er sú staðreynd að það virðist ekki vera til neinn góður terminal client fyrir kerfið. Terminal.app forritið frá Apple er að mörgu leyti ágætt, en hins vegar er það óþægilegt þegar maður þarf að hafa afskaplega mörg terminöl opin í einu. Hvað getur maður notað til þess að skipta á milli þeirra? Exposé? Ansi hræddur um ekki (sjá mynd til hliðar).

Fyrir vikið hef ég notað iTerm undanfarin ár. Það forrit hefur "tabs" þannig að allar sessions eru geymdar í einum glugga, og tabbarnir merktir þeim vélum sem maður er tengdur. Hins vegar hefur iTerm orðið hægari með hverri útgáfunni, og er nú með útgáfu 0.8.2 orðið svo hægt að það er varla nothæft á 1250Mhz vél. Ég hef komist í kringum þennan ókost með því að nota hreinlega eldri útgáfu (0.7.7). Aftur á móti, þá er enginn shortcut key til þess að stækka gluggana (Zoom Window) í þeirri útgáfu. Þetta angraði mig heilmikið, þar til ég ákvað loksins að gera eitthvað í málunum. Ég sótti útgáfu 0.7.7 af iTerm úr CVS repository-inu á SourceForge og hakkaði eilítið í kóðanum þar til ég fékk þá fídusa sem ég vildi.

Í þessari nýju útgáfu minni af gamla iTerm get ég látið terminal gluggann fylla skjáinn með einfaldri Cmd-Shift-Z skipun, flippað milli tab-a og unnið á mörgum tölvum í einu, og á ásættanlegum hraða. Þeir sem hafa áhuga á að nálgast þessa breyttu útgáfu af iTerm geta sótt hana hér.

Gunnar Jóhannesson prestur skrifar grein þar sem hann kennir félagslegan darwinisma við vísindahyggju. Nú þykist ég ekki vita hvað maðurinn meinar með "vísindahyggju", en það er bersýnilegt hverjum einasta þenkjandi manni að kenningin um þjóðfélagsskipan sem kallast félagslegur darwinismi hefur ekkert með þróunarkenningu Darwins að gera, er sögulegur fyrirrennari hennar, og er ekki í það minnsta vísindaleg. Vísindi fást ekki við gildismat -- þau geta t.a.m. ekkert sagt um siðferðislegar spurningar -- en félagslegur darwinismi felur einmitt í sér viss gildi, þ.e.a.s. að ákveðin samfélagstegund sé réttlát.

Ef ákveðin þjóðfélagsskipan filterar út fólk með eiginleikana A og B, þá segir það ekkert um hlutlægt ágæti viðkomandi eiginleika, því samfélagið mætti allt eins hátta þannig að eiginleikar A og B séu þróunarlega æskilegir. Hið sama á við um kenningu Darwins -- það er að öllum líkindum ekki þróunarlega æskilegt að vera hvítabjörn í Sahara eyðimörkinni eða kameldýr á norðurheimsskauti. Kenning Darwins segir ekkert um ágæti eða tilvistarrétt hvítabjörnsins eða kameldýrsins -- það er ekkert réttlátt við gang náttúrunnar, enda hugtak eins og réttlæti merkingarlaust utan siðferðisramma mannsins. Fyrir vikið er það fráleit vitleysa að halda því fram að "gildin á bak við vísindi" hafi leitt menn til félagslegs darwinisma -- það eru engin slík undirliggjandi gildi.

Herbert Spencer

Ofan á það má bæta að félagslegur darwinismi er gjarnan kenndur við Herbert nokkurn Spencer, sem er höfundur frasans "Survival of the fittest". Kenningar Spencers eru flestar algjörlega út í hött -- t.a.m. trúði hann því, að mig minnir, að konur væru heimskari en karlar vegna blóðtaps við blæðingar. Hann kemst ekki að þessum niðurstöðum sínum með því að beita vísindalegum aðferðum eða gegnum tilraunir og rannsóknir. Fyrir vikið myndi ekki einn einasti vísindalega þenkjandi maður góðkenna þær, hvað þá kalla þær "vísindalegar".

Það sem öll vísindi vs. trúarbrögð umræðan snýst um, er fyrst og fremst lífsviðhorf. Vísindi geta ekki sýnt fram á að æðri máttarvald sé ekki til, enda ómögulegt að sanna neikvæða tilvistarsetningu. Vísindi er aðferðafræði, ekki lífsafstaða. En það er fyrst þannig sem hræsni trúaða mannsins kemur í ljós. Eins og heimspekingurinn Charles Sanders Peirce orðaði það, þá beita allir vísindalegri aðferð í daglegu lífi (sjá The Fixation of Belief); þegar bíll héraðsprestsins bilar þá biður hann ekki Guð um að laga vélina, heldur fer með hann á verkstæði líkt og aðrir menn; mismunurinn á hinum skeptíska manni gagnstætt hinum trúaða er sá að hinn skeptíski heldur sig við eina aðferðafræði til þess að gera upp um spurningar, á meðan sá trúaði beitir tveimur aðferðum, sem oft eru gagnstæðar.

Besta Family Guy intróið (13.6MB MPEG innlent) -- tekur fyrir allar verstu framhaldsþáttaklisjurnar.

Vil benda þeim sem áhugasamir eru um vefsmíði á stutta grein sem ég skrifaði um notkun Data URLa í CSS: Using Data URLs Effectively with Cascading Style Sheets

Svo minni ég á að það eru BarDagar í Reykjavík þessa helgi, fyrir okkur fólkið sem verður eftir í siðmenningunni.

Það mun eflaust vekja mikla gleði meðal notenda Mentatsins að ný útgáfa (3.1) er komin út, með stuðningi fyrir því að breyta athugasemdum. Tölfræðimekanisminn ("Statistics") er einnig kominn til baka í nýrri mynd. Ég var að keyra hann í gegn áðan, og hann hefur eftirfarandi að segja um Mentat gagnagrunninn fyrir sveinbjorn.org:

Glæsilegar fréttir fyrir Internet Explorer notendur, sem ég hef hingað til vísað brott af vefsetri þessu -- næsta uppfærsla af þessum úrelta vafra frá Microsoft mun heldur ekki geta birt vefsíðuna mína rétt, þrátt fyrir þá staðreynd að um 4 ár séu síðan vafrinn var síðast uppfærður, og tæpast nokkur afsökun fyrir IE-teymið hjá Micro$oft að gefa ekki út algjörlega staðlasamræmdan ofurvafra. Sjá skrínsjottið hér til hliðar til að skoða hvernig þessi svokallaði "next-generation" IE7 vafri birtir algjörlega W3C-samhæfða HTMLið mitt.

Eftir því sem ég fæ best séð, þá eru tvö vandamál algjörlega óleyst frá IE6:

• Enginn stuðningur fyrir Data URL -- þótt hann hafi verið til staðar í Firefox, Safari og Opera heillengi
• float CSS eiginleikinn virkar ekki rétt, ýtir undan sér öðrum elementum -- e-ð sem hann gerir *ekki* í neinum öðrum samtímavafra

Þetta er skítugur, illa lyktandi turdur sem er að halda aftur þróun á veftækni sökum markaðsstöðu Windows stýrikerfisins.

Ég er búinn að bæta inn þeirri hæfni í Mentat að breyta commentum -- nú geta notendur Mentat-kerfisins brátt ritskoðað athugasemdir á vefnum þeirra eftir hjartans lyst.